ខេត្តសៀមរាប៖ អាកាសយានដ្ឋានអន្តរជាតិសៀមរាបអង្គរ បានសម្ពោធដាក់ឱ្យដំណើការរូបសំណាក"ព្រះរាជគ្រូទិវាករបណ្ឌិត” និងរូបសំណាក"ជីវ តាខ្វាន់” ក្នុងឱកាសអបអរសាទរគម្រប់ខួប ២ឆ្នាំ នៃការបើកដំណើរការជាផ្លូវការអាកាសយានដ្ឋានអន្តរជាតិសៀមរាបអង្គរនេះ។

ពិធីសម្ពោធធ្វើឡើងនៅថ្ងៃទី១៦ ខែតុលា ឆ្នាំ២០២៥ ក្រោមអធិបតីភាពលោកបណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលលោក ប្រាក់ សោភ័ណ អភិបាលនៃគណៈអភិបាលខេត្តសៀមរាប និងមានការអញ្ជើញចូលរួមពីសំណាក់លោក Lu Qizhi ប្រធានការិយាល័យកុងស៊ុលចិនប្រចាំខេត្តសៀមរាប តំណាង ឯកអគ្គរដ្ឋទូតចិនប្រចាំកម្ពុជា។

រូបសំណាកដ៏មានអត្ថន័យជាប្រវត្តិសាស្ត្ររបស់ព្រះរាជគ្រូទិវាករបណ្ឌិត ដែលជាអ្នកផ្ដើមគំនិតក្នុងការសាងសង់ប្រាសាទអង្គរវត្តដ៏អស្ចារ្យ និងរូបសំណាកលោក ជីវ តាក្វាន់ បេសកទូតចិនដ៏ល្បីល្បាញ នេះ ដើម្បីអបអរសាទរខួប ២ឆ្នាំនៃការបើកដំណើរការជាផ្លូវការនៃអាកាសយានដ្ឋាននេះ និងជាការរំលឹកដល់ទំនាក់ទំនងវប្បធម៌ និងការទូតកម្ពុជា-ចិន អស់រយៈពេលជាង ២ ០០០ឆ្នាំ។

គួរឱ្យដឹងថា ព្រះរាជគ្រូទិវាករបណ្ឌិត ជាតួអង្គដ៏សំខាន់មួយនៅក្នុងប្រវត្តិសាស្រ្តនាសម័យអង្គរ មានចំណេះវិជ្ជាខ្ពង់ខ្ពស់ និងបានបម្រើព្រះមហាក្សត្ររហូតដល់ ៥ព្រះអង្គ រួមទាំងក្នុងរាជ្យព្រះបាទសូរ្យវរ្ម័នទី២ ផងដែរ។ នៅដើមសតវត្សទី១២ «ព្រះរាជគ្រូទិវាករបណ្ឌិត» បានផ្ដួចផ្ដើមគំនិតក្នុងការសាងសង់ប្រាសាទអង្គរវត្ត។

ដោយឡែកលោក ជីវ តាក្វាន់ ជាបេសកទូតចិន និងជាឥស្សរជនប្រវត្តិសាស្ត្រ ដែលបានមកទស្សនកិច្ចនៅកម្ពុជានាចុងសម័យអង្គរ (ពីឆ្នាំ១២៩៦-១២៩៧)។ លោកបានចូលរួមចំណែកយ៉ាងសំខាន់ក្នុងការសរសេររៀបរាប់លម្អិតអំពីកំណត់ត្រា «ប្រពៃណីនៃអ្នកស្រុកចេនឡា» ជាឯកសារដ៏សំខាន់ក្នុងការសិក្សាអំពីទំនៀមទម្លាប់ និងប្រវត្តិសាស្ត្ររបស់ប្រទេសកម្ពុជា។

ការកំណត់ចម្លាក់ និងព័ត៌មានលម្អិតអំពី «ព្រះរាជគ្រូទិវាករបណ្ឌិត» ត្រូវបានដកស្រង់ និងសម្រួលចេញពីសៀវភៅ “កវីបណ្ឌិតសម័យអង្គរ៖ ប្រវត្តិ និងស្នាដៃ” ដែលនឹងធ្វើការបោះពុម្ពផ្សាយនាពេលឆាប់ៗខាងមុខ ជាលទ្ធផលនៃការស្រាវជ្រាវរបស់មហាវិទ្យាល័យសង្គមសាស្រ្ត និងមនុស្សសាស្រ្ត នៃសាកលវិទ្យាល័យភូមិន្ទភ្នំពេញ។

បើតាមការឱ្យដឹងពីលោក បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ថា រូបសំណាកទាំងពីរនេះ ជានិមិត្តរូបនៃស្ពានសាមគ្គីសហប្រតិបត្តិការដ៏សំខាន់មួយ តភ្ជាប់កម្ពុជាទៅកាន់ពិភពលោក។ SAI ត្រូវបានរំពឹងទុកថានឹងបន្តមានកំណើនជើងហោះហើរ អ្នកដំណើរ និងក្រុមហ៊ុនអាកាសចរណ៍កើនឡើងបន្ថែមទៀតនាពេលអនាគត។

លោក លី ជីជី (Lu Qizhi) ប្រធានការិយាល័យកុងស៊ុលនៃស្ថានទូតចិនប្រចាំខេត្តសៀមរាប បានគូសបញ្ជាក់ថា ក្នុងរយៈពេល ២ឆ្នាំមកនេះ ចំនួនជើងហោះហើរមានការកើនឡើងជាលំដាប់ អាជីវកម្មអាកាសយានដ្ឋានត្រូវបានកែលម្អឥតឈប់ឈរ និងបានចាប់ផ្តើមជំរុញការអភិវឌ្ឍន៍សេដ្ឋកិច្ចអាកាសយានដ្ឋានគាំទ្រ ដោយទាក់ទាញភ្ញៀវទេសចរកាន់តែច្រើនឡើងពីជុំវិញពិភពលោក។

លោក លី ជីជី ក៏បានលើកឡើងពីភាពជោគជ័យនៃ “ឆ្នាំនៃការផ្លាស់ប្ដូរប្រជាជនទៅប្រជាជនចិន-កម្ពុជា” ឆ្នាំ២០២៤ និងការឈានចូល “ឆ្នាំទេសចរណ៍ចិន-កម្ពុជា” ឆ្នាំ២០២៥ ដែលស្ថានទូតចិន និងស្ថាប័នពាក់ព័ន្ធកម្ពុជា បានបង្កើនកិច្ចសហប្រតិបត្តិការជំរុញជើងហោះហើរ និងផ្សព្វផ្សាយទេសចរណ៍។

លោកបន្ថែមថា ជាក់ស្តែង ចាប់ពីខែមករា ដល់ខែកញ្ញា ឆ្នាំ២០២៥ ភ្ញៀវទេសចរចិនជាង ៦២ ០០០នាក់ បានមកទស្សនាប្រាសាទអង្គរវត្ត កើនឡើង ១២,៨% ធៀបនឹងឆ្នាំមុន ហើយក្នុងខែកញ្ញា ចិនបានក្លាយជាប្រទេសដែលមានចំនួនភ្ញៀវទេសចរចូលទស្សនាប្រាសាទអង្គរវត្តច្រើនជាងគេ៕

ទាញយកកម្មវិធីទូរស័ព្ទ

មាតិកាព័ត៌មាន

បណ្តាញសង្គម